Allegra e bainvgnüts sülla pagina d'internet da la scoula da Zernez

In nos cumün da Zernez cun sias fracziuns Brail, Susch e Lavin pon las scolaras e'ls scolars frequentar la scoulina in Chasa Cumünala, la scoula primara sco eir il s-chalin ot. Tuot las instituziuns as rechattan a Zernez.

La chasa da scoula attractiva e moderna da la scoula primara e secundara as rechatta be dasper il Museum dal Parc Naziunal.

L'on scolastic 2025/26 vegnan instruits 155 scolaras e scolars da 25persunas d'instrucziun. Nossas scolaras e noss scolars han las seguaintas linguas maternas: rumantsch, tudais-ch, frances, talian, portugais, spagnöl, albanais, ungarais ed slovac. Tanter las persunas d'instrucziun sun rapreschantadas la lingua rumantscha, tudais-cha, inglaisa, taliana e portugaisa.

Las experienzas linguisticas e culturalas variadas vezzain nus sco inrichimaint. Nus sustgnain, accumpagnain e promovain nossas scolaras e noss scolars sün lur via da scuvrir e sviluppar lur talents.

In cas da dumondas generalas chi pertoccan la scoula as drizzan Ellas/Els il meglder al secretariat da scoula. Il prüm punct da contact per dumondas davart Lur uffant es la persuna d'instrucziun da classa. Ellas/Els ragiundschan las persunas d'instrucziun il meglder via e-mail (prenom.nom@miascoula.ch) o per telefon via il secretariat.

La direcziun da scoula es tanter oter cumpetenta per andamaints scolastics, per garantir la qualità e per sviluppar inavant la scoula. In cas da dumondas e giavüschs sta la direcziun da scoula gugent a disposiziun. Ch'Ellas/Els fetschan giò per plaschair ouravant ün termin. Gugent organisain nus, tenor bsögn, ün discuors cun traducziun.