Zernez - center da l'Engiadina

Pro'l Cumün da Zernez toccan ils lös da vacanzas Zernez, Brail, Susch e Lavin. Els sun la porta pel Parc Naziunal e sun il center da l'Engiadina. Els collian l'Engiadina Bassa e la Val Müstair cull'Engiadin'Ota. L'attracziun principala es sgür il Parc Naziunal cun sia grondezza da 170 kmq, l'unic  Parc Naziunal Svizzer, il plü grond reservat da natüra dal pajais. El es la patria da indombrablas bes-chas raras da las alps e lascha in üna cuntrada muntagnarda, sulvadia a la natüra seis gir.

Il Cumün da Zernez es situà tanter ils trais pajais cunfinants Svizra-Italia-Austria ed es causa quai eir il punct da partenza per bleras excursiuns, chi sun  ragiundschablas infra ün'ura: lapro toccan blers lös per ir cul velo o per far gitas, plüssas plazzas da golf, loipas da passlung e pistas da skis. Zernez, Brail, Susch e Lavin han ün'hotellaria classica cun predschs onests e buna qualità. Üna vasta sporta da restorants regiunals augmaintan la sporta. 

Brail – 100 abitants, üna staila da Michelin

Brail es güst avant Zernez ed ha be var 100 abitants. L'attracziun turistica principala dal cumün es - sper la baselgia refuormada, chi sta suot protecziun da monumaints  – il In Lain hotel Cadonau, chi spetta cun trais restorants. Ün da quels es dafatta onurà cun üna staila da Michelin e 16 puncts Gault-Millau.

Ultreiuras infuormaziuns

 

 

 

Zernez – la porta al parc naziunal

Zernez nu fascinescha be sco porta al parc naziunal, dimpersè eir cun architectura e möd da viver engiadinais autentic sco eir cun üna fich buna infrastructura turistica: Cun ün bogn da famiglias e da wellness, il Center da Sport cun plazza da sport, implant da minigolf, plazza da giovar, implant da cuorrer, parc per assas ed inlines, plazza da glatsch artificiala e natürala sco eir gardarobas pel passlung spordscha el premissas idealas per bellas vacanzas.  La gronda plazza da camping es pro blers giasts regulars fich bainvissa. Situà al pass dal Fuorn, al punct da traffic istoric tanter Engiadina Bassa ed Engiadin'Ota, es Zernez predestinà sco lö da partenza per aventüras in üna cuntrada magnifica: Davant las portas da la regiun as chatta üna rait da sendas, vias da velo.

Ulteriuras infuormaziuns & broschüras

 

 

Susch – il cumün al pass dal Flüela

 „La Tuor“ e la baselgia marcan il purtret dal cumün da Susch. Aint il triangul tanter Scuol, Zernez e Tavo es il cumün da pass al Flüela ideal per excursiuns i'ls cumüns e las vals vaschinas. L'unic cumün in Engiadina Bassa, ingio cha l'En passa immez il cumün, es el l'unica colliaziun da traffic vers nordvest cul pass dal Flüela ed il tunnel dal Vereina. Cur cha'ls vittürins e marchadants i'l temp da las charozzas da posta giaivan sur il Flüela fluriva Susch. Fich da cusgliar es üna visita sülla fortezza „Rohan“.

Ulteriuras infuormaziuns & broschüras

http://www.engadin.com/ferienorte/engadin-scuol-winter/susch/?S=2&R=2

Lavin – ün cumün cun caracter

Lavin as lascha gugent da la vart, o a schnestra o a dretta, dependa schi's vegn da Scuol o da Zernez. Perquai cha Lavin nun es ün tipic cumün Engiadinais ed es situà plütost illa val invezza sülla costa sulagliva. Ma quai es bun uschè, quai cun laschar da la vart e quai cun giò la val. Lavin nun es üna bellezza, Lavin ha caracter. Ma quel as sto il prüm scuvrir. Lavin dovra temp, perquai cha bellezza chi vegn dadaint oura, nu's vezza subit. E Lavin es oter, quai as vezza subit.

Ulteriuras infuormaziuns e broschüras